Daktari wa viungo Haruna Ayubu, maarufu kama Rubai, mwenye Umri wa Miaka 63 mkazi wa Bukoba, ametuhumiwa kumbaka mtoto wa miaka 12 katika kipindi cha kati ya Desemba 2023 na Oktoba 2024 ambapio  kesi hiyo inasikilizwa katika Mahakama ya Wilaya ya Bukoba.

Kwa mujibu wa upande wa mashtaka, Rubai alimvua nguo Mtoto huyo na kumwingilia kimwili mara kadhaa, kisha kumpatia fedha kwa ajili ya kuwapelekea Wazazi wake.  Mnamo Oktoba 19, mtoto ambaye ni mhanga wa tukio hilo alikamatwa na askari Polisi baada ya kutoka ofisini kwa mshtakiwa na uchunguzi wa Daktari ulithibitisha kuwa Mtoto huyo alibakwa.

Upande wa mashtaka una mashahidi 10, vielelezo vya maandishi vitatu, na ripoti ya Daktari hata hivyo   Wakili wa mshtakiwa, Frank John, aliiomba Mahakama kuahirisha kesi ili apate muda wa kuandaa utetezi na kuzungumza na mteja wake huku  upande wa mashtaka ukiomba kesi hiyo  kusikilizwa haraka kwa maslahi ya mtoto ili asiendelee kuja Mahakamani mara kwa mara.

aidha, Mahakama iliweka masharti ya dhamana ya kuwa na wadhamini wawili wenye mali zisizohamishika zenye thamani ya milioni nne kila mmoja ambapo kesi hiyo itatajwa tena Oktoba 29, 2024.

Naibu Waziri Mkuu na Waziri wa Nishati Mhe. Dkt. Doto Biteko, amesema kuwa Tanzania inayo nafasi kubwa ya kujifunza Teknolojia ya uwambaji wa magari (Assembling) yanayotumia umeme kutoka kiwanda cha magari cha HYUNDAI kwani ni rafiki kwa mazingira na hupunguza uchafuzi wa hali ya hewa.

Dkt. Biteko ameyasema hayo Oktoba 23, 2024 nchini Singapore mara baada ya kutembelea kiwanda hicho ikiwa ni ziara mojawapo kwenye mkutano wa Wiki ya Nishati nchini Singapore na kusema kuwa Teknolojia kama hizi zina mchango mkubwa kwenye kuinua uchumi wa nchi na kuongeza pato la Taifa.

‘’ Nawapongeza sana wenzetu hususani kwa Teknolojia na ubunifu wa haya magari pamoja na Teknolojia ya Kilimo janja (smart farm) ambapo kwanza inatumia nafasi ndogo lakini matokeo yake ni makubwa sana’’ Alisema Dkt. Biteko. Kuhusu Teknolojia ya kilimo janja ambacho kinaendeshwa na kampuni ya ubunifu ya HYUNDAI kwa kutumia Teknolojia mnemba (Robot) Dkt.

Biteko amesema, uwepo wa Teknolojia kama hii unaongeza tija, inapunguza gharama kwenye uendeshaji wake. Naye, Makamu wa rais na Mkuu wa Biashara na mipango kutoka HYUNDAI Motor Group amesema mafanikio hayo yanayotokana na kutumia fursa iliyopo wakati wa changamoto zilizokuwepo awali kama ya matumizi ya mafuta kwenye magari ambapo haikuwa rafiki kwa mazingira pamoja na uhaba wa maeneo kwa ajili ya kilimo nchini Singapore.

Takriban shilingi bilioni 2.57 zinatarajiwa kutumika katika halmashauri ya wilaya ya Ngara mkoani Kagera kwa ajili ya utekelezaji wa miradi mbalimbali ya maendeleo ambayo ipo chini ya Wakala ya Barabara za Vijijini na Mijini (TARURA). Hayo yamebainishwa na Kaimu Meneja TARURA – NGARA Eng. Christopher Masunzu alipokuwa akizungumza na Ishizwe TV.

Eng. Masunzu amesema fedha hizo zimetengwa kwa mwaka wa fedha 2024/2025 kwa ajili ya matengenezo ya barabara zenye urefu wa kilomita 227 ambapo kilomita 1.4 itakuwa ni kiwango cha lami katika kata za kabanga na Ngara mjini huku kata nyinginezo sita zikinufaika na matengenezo hayo kwa kiwango cha changarawe.

Sanjari na hilo, TARURA wilaya ya Ngara inatarajia kufungua barabara mpya zenye urefu wa kilomita 20 ili kurahisisha shughuli za usafirishaji kwa wananchi ikiwemo kufika katika maeneo yasiyo fikika.

Zaidi ya vijana 500 kutoka mataifa mbalimbali ya Afrika wamekutana Jijini Arusha ,Tanzania Oktoba 21, 2024 kujadili namna watakavyoweza kupata fursa na haki ya kumiliki ardhi katika nchi zao, na kuitumia kujikwamua kwenye umaskini.

Mkutano ulioandaliwa na Taasisi ya kimataifa inayofuatilia haki za vijana katika masuala ya ardhi kwa ushirikiano na umoja wa Afrika (AU) na shirika la maendeleo la ujerumani (GIZ), unalenga kuwakutanisha pamoja vijana na wadau wengine wakiwemo viongozi wa serikali na taasisi za kiraia, ili kujadili namna ya kuwezeja vijana kufahamu umuhimu wa ardhi, na namna ya kuitumia kujikwamua kimaisha.

Wakizungumza katika mkutano huo unaofanyika wakati ambao asilimia kubwa ya vijana wa nchi za bara la Afrika wanategemea kupata ardhi kwa kurithi baada ya wazazi wao kufariki , baadhi ya vijana walisema kuwa wakati umefika wa serikali za Afrika kuweka sheria na sera rafiki zinazotekelezeka na zenye tija kwa vijana.

Mkutano huo pia ulileta pamoja wataalam wa ardhi kutoka serikali za baadhi ya nchi za Afrika ikiwemo Tanzania ambao walisema kwamba kuna haja kubwa ya kuongeza nguvu kuwawezesha vijana kuelewa umuhimu wa ardhi na namna inavyoweza kuwasaidia katika harakati za kukabiliana na hali ya umasikini .